Hvað ætli sé þá heildarbrottkast á Íslandsmiðum?

Þetta er nokkuð merkileg frétt. Eða á ég að segja ekki frétt? Byrjun hennar hljómar eins og nú sé loksins í eitt skipti fyrir öll búið að kveða uppúr um umfang brottkasts á Íslandsmiðum og svo er sagt að væntanlega sé undirmálsfiskur stærsti hluti brottkastsins. Að auki er haft eftir Friðriki J. að brottkast hafi ekkert með kvótakerfið að gera, það hendi allir fiski. Það er svosem rétt að það henda allir fiski, sem engin verðmæti eru í, en þeir sem eru með frjálsa sókn eða sóknastýringu kasta ekki verðmætum í hafið eins og gert þar sem notast er við kvótastýringu.

Það er rétt sem kemur fram í fréttinni að undirmálsfiskur er stærsti hluti brottkastsins, í raun er það nær allur hluti þess brottkasts sem verið var að rannsaka. Það er einungis verið að kanna brottkast fisks upp að ákveðinni lengd og gert ráð fyrir að allur fiskur yfir þeirri lengd sé hirtur. Hér er brot úr þessari skýrslu Hafró. 

 Forsenda þessara útreikninga er að ekkert brottkast eigi sér stað eftir að tiltekinni lengd er náð. Aðferðin byggist þannig á því að brottkast sé lengdarháð og fiski (smáfiski) á tilteknu lengdarbili sé hent, að einhverju marki, en stærri fiskur hirtur. Ef þessi forsenda er ekki til staðar, þ.e. ef fiski er hent tilviljunarkennt án tillits til lengdar, t.d. skemmdum fiski, eða öllum fiski af tiltekinni tegund er hent, t.d. vegna kvótastöðu útgerðar, þá er aðferðin ónothæf til að meta slíkt brottkast. Brottkast af þeim toga væri því viðbót við brottkast sem mælt er með þessari lengdarháðu aðferð. Ætla verður að slíkt brottkast eigi sér stað í fiskveiðunum, en umfang þess er óþekkt stærð.

Svo kemur þetta aðeins seinna.

 Það brottkast sem lýst er í þessari grein er því skilgreint sem lágmarksbrottkast á Íslandsmiðum.

 

Það er semsagt ekki verið að rannsaka heildarbrottkast heldur verið að reyna að gera sér lítillega grein fyrir hversu miklum smáfiski er fleygt í hafið. Ætli ég sé einn um það að velta því fyrir mér hver tilgangurinn með þessum útreikningi sé? Þetta segir okkur ekkert um raunverulegt brottkast og ég veit raunar ekki hvað þetta á að segja okkur.

Að auki þá vita þeir sem verið hafa á sjó að þegar veiðieftirlitsmenn eru um borð þá forðast skipstjórar svæði þar sem hætt er við að smáfiskur sé verulegur hluti aflans. Það gera þeir bæði vegna þess að varla er hægt að henda smáfiski nema þegar veiðieftirlitmaðurinn étur eða sefur og eins er hætt við enn einni skyndilokuninni slæðist of mikið af smáfiski með.

 

Fiskur fyrir 386 millj. fór beint í sjóinn aftur

Athugasemdir

[zappa (IP-tala skráð) 28.10.2009 kl. 23:20]

réttið upp hendi þeir sem bjuggust við að Friðrik "lítillkall" Arngrímsson mundi kenna kvótakerfinu um brottkastið,afhverju ætli einhver sem vinnur við sjómennsku hafi ekki frekar verið spurður,þessi litli kall veiðir örugglega ekkert meir en lax,sem hann hendir ekki.

[Hafsteinn Viðar Ásgeirsson, 29.10.2009 kl. 09:00]

Alveg hárrétt skilgreining á þessari makalausu "skýrslu" hjá þér LÍÚ, (frábært nafn...:-) og hvað ætli verði margir dagar þar til allir fjölmiðlar éta upp þvaðrið og fara með eins og blákaldar staðreyndir. Í stað þess að fara í málið, eins og fjölmiðlar ættu að gera, skoða og upplýsa. 

Nei þessu er bara ekki við bjargandi, held ég.

[L.i.ú., 29.10.2009 kl. 16:57]

Já það hefði verið gáfulegra að tala við starfandi sjómann heldur en Friðrik J. Maður skilur ekki hvern fjandann blaðamaðurinn var hugsa að tala við Friðrik. Þetta er heimskulegra en að spyrja Davíð Oddsson hvort Seðlabankinn bæri hugsanlega e-a ábyrgð á efnahagshruninu.

Ef aðrir fjölmiðlar nenna að fjalla um þetta þá taka þeir trúlega bara "fréttina" sem Hafró birti um þessa skýrslu. Í fréttinni er ekkert minnst á annmarka rannsóknarinnar. En aftur á móti er tiltekið hversu mörgum fiskum að meðaltali var hent í hafið á árunum 2001-2008. Þetta eru ótrúlegir snillingar.

[Hafsteinn Viðar Ásgeirsson, 29.10.2009 kl. 18:38]

Já ég er sammála, fréttin er algerlega galin, en sennilega ekki von á öðru því hún er sjáanlega eingöngu til að styðja undir delluna frá Friðrik og hans nótum. Það er nú aðalfundur í pípunum og hann útheimtir alltaf svona smá af flugeldum og fréttamenn skorast ekki undan í dellumakinu.